३. द्वेभागसिक्खापदवण्णना

५५२. तेन समयेनाति द्वेभागसिक्खापदं. तत्थ अन्ते आदियित्वाति सन्थतस्स अन्ते अनुवातं विय दस्सेत्वा ओदातं अल्लियापेत्वा.

द्वे भागाति द्वे कोट्ठासा. आदातब्बाति गहेतब्बा. गोचरियानन्ति कपिलवण्णानं. द्वे तुला आदातब्बाति चतूहि तुलाहि कारेतुकामं सन्धाय वुत्तं. अत्थतो पन यत्तकेहि एळकलोमेहि कातुकामो होति, तेसु द्वे कोट्ठासा काळकानं एको ओदातानं, एको गोचरियानन्ति इदमेव दस्सितं होतीति वेदितब्बं. सेसं उत्तानत्थमेव.

समुट्ठानादीनिपि कोसियसिक्खापदसदिसानेव. केवलं इदं आदाय अनादाय च करणतो किरियाकिरियं वेदितब्बन्ति.

द्वेभागसिक्खापदवण्णना निट्ठिता.