३-४. उपक्किलेससुत्तादिवण्णना

२१४-२१५. चतुत्थवग्गस्स ततिये न च पभस्सरन्ति न च पभावन्तं. पभङ्गु चाति पभिज्जनसभावं. अयोति काळलोहं. ठपेत्वा इध वुत्तानि चत्तारि अवसेसं लोहं नाम. सज्झूति रजतं. चित्तस्साति चतुभूमकचित्तस्स. लोकियस्स ताव उपक्किलेसो होतु, लोकुत्तरस्स कथं होतीति? उप्पज्जितुं अप्पदानेन. यदग्गेन हि उप्पज्जितुं न देन्ति, तदग्गेनेव ते लोकियस्सापि लोकुत्तरस्सापि उपक्किलेसा नाम होन्ति. पभङ्गु चाति आरम्मणे चुण्णविचुण्णभावूपगमनेन भिज्जनसभावं. अनावरणा अनीवरणाति कुसलधम्मे न आवरन्तीति अनावरणा, न नीवरन्ति न पटिच्छादेन्तीति अनीवरणा. चेतसो अनुपक्किलेसाति चतुभूमकचित्तस्स अनुपक्किलेसा.