१. समाधिसुत्तवण्णना

२४९. वेदनासंयुत्ते सगाथावग्गस्स पठमे समाहितोति उपचारेन वा अप्पनाय वा समाहितो. वेदना च पजानातीति वेदना दुक्खसच्चवसेन पजानाति. वेदनानञ्च सम्भवन्ति तासंयेव सम्भवं समुदयसच्चवसेन पजानाति. यत्थ चेताति यत्थेता वेदना निरुज्झन्ति, तं निब्बानं निरोधसच्चवसेन पजानाति. खयगामिनन्ति तासंयेव वेदनानं खयगामिनं मग्गं मग्गसच्चवसेन पजानाति. निच्छातो परिनिब्बुतोति नित्तण्हो हुत्वा किलेसपरिनिब्बानेन परिनिब्बुतो. एवमेत्थ सुत्ते सम्मसनचारवेदना कथिता. गाथासु द्वीहि पदेहि समथविपस्सना कथिता, सेसेहि चतुसच्चं कथितं. एवमेत्थ सब्बसङ्गाहिको चतुभूमकधम्मपरिच्छेदो वुत्तो.