३-५. पठमसमिद्धिमारपञ्हासुत्तादिवण्णना

६५-६७. ततिये समिद्धीति अत्तभावस्स समिद्धताय एवं लद्धनामो. तस्स किर थेरस्स अत्तभावो अभिरूपो अहोसि पासादिको, उक्खित्तमालापुटो विय अलङ्कतमालागब्भो विय च सब्बाकारपारिपूरिया समिद्धो. तस्मा समिद्धित्वेव सङ्खं गतो. मारोति मरणं पुच्छति. मारपञ्ञत्तीति मारोति पञ्ञत्ति नामं नामधेय्यं. अत्थि तत्थ मारो वा मारपञ्ञत्ति वाति तत्थ मरणं वा मरणन्ति इदं नामं वा अत्थीति दस्सेति. चतुत्थं उत्तानमेव, तथा पञ्चमं.