६. अविज्जावग्गवण्णना

५३-६२. अविज्जावग्गे अविज्जाति चतूसु सच्चेसु अञ्ञाणं. विज्जाति अरहत्तमग्गविज्जा. अनिच्चतो जानतो पस्सतोति दुक्खानत्तवसेनापि जानतो पस्सतो पहीयतियेव, इदं पन अनिच्चवसेन कथिते बुज्झनकपुग्गलस्स अज्झासयेन वुत्तं. एसेव नयो सब्बत्थ. अपि चेत्थ संयोजनाति दस संयोजनानि. आसवाति चत्तारो आसवा. अनुसयाति सत्त अनुसया. सब्बुपादानपरिञ्ञायाति सब्बेसं चतुन्नम्पि उपादानानं तीहि परिञ्ञाहि परिजाननत्थाय. परियादानायाति खेपनत्थाय. सेसं सब्बत्थ उत्तानमेवाति.

अविज्जावग्गो छट्ठो.