८. समुग्घातसारुप्पसुत्तवण्णना

३०. अट्ठमे सब्बमञ्ञितसमुग्घातसारुप्पन्ति सब्बेसं तण्हामानदिट्ठिमञ्ञितानं समुग्घाताय अनुच्छविकं. इधाति इमस्मिं सासने. चक्खुं न मञ्ञतीति चक्खुं अहन्ति वा ममन्ति वा परोति वा परस्साति वा न मञ्ञति. चक्खुस्मिं न मञ्ञतीति अहं चक्खुस्मिं, मम किञ्चनपलिबोधो चक्खुस्मिं परो चक्खुस्मिं, परस्स किञ्चनपलिबोधो चक्खुस्मिन्ति न मञ्ञति. चक्खुतो न मञ्ञतीति अहं चक्खुतो निग्गतो, मम किञ्चनपलिबोधो चक्खुतो निग्गतो, परो चक्खुतो निग्गतो, परस्स किञ्चनपलिबोधो चक्खुतो निग्गतोति एवम्पि न मञ्ञति, तण्हामानदिट्ठिमञ्ञनानं एकम्पि न उप्पादेतीति अत्थो. चक्खुं मेति न मञ्ञतीति मम चक्खूति न मञ्ञति, ममत्तभूतं तण्हामञ्ञनं न उप्पादेतीति अत्थो. सेसं उत्तानमेवाति. इमस्मिं सुत्ते चतुचत्तालीसाय ठानेसु अरहत्तं पापेत्वा विपस्सना कथिता.