१६. नन्दिक्खयवग्गो

१-४. अज्झत्तनन्दिक्खयसुत्तादिवण्णना

१५६-१५९. नन्दिक्खयवग्गस्स पठमे नन्दिक्खया रागक्खयो, रागक्खया नन्दिक्खयोति नन्दिया च रागस्स च अत्थतो एकत्ता वुत्तं. सुविमुत्तन्ति अरहत्तफलविमुत्तिवसेन सुट्ठु विमुत्तं. सेसमेत्थ दुतियादीसु च उत्तानमेव.

५-६. जीवकम्बवनसमाधिसुत्तादिवण्णना

१६०-१६१. पञ्चमं समाधिविकलानं, छट्ठं पटिसल्लानविकलानं चित्तेकग्गतञ्च कायविवेकञ्च लभन्तानं एतेसं कम्मट्ठानं फातिं गमिस्सतीति ञत्वा कथितं. तत्थ ओक्खायतीति (पच्चक्खायति) पञ्ञायति पाकटं होति. इति द्वीसुपि एतेसु सह विपस्सनाय चत्तारो मग्गा कथिता.

७-९. कोट्ठिकअनिच्चसुत्तादिवण्णना

१६२-१६४. सत्तमादीसु तीसु थेरस्स विमुत्तिपरिपाचनिया धम्माव कथिता.

१०-१२. मिच्छादिट्ठिपहानसुत्तादिवण्णना

१६५-१६७. दसमादीनि तीणि पाटियेक्केन पुग्गलज्झासयवसेन वुत्तानि. तेसं अत्थो वुत्तनयेनेव वेदितब्बोति.

नन्दिक्खयवग्गो सोलसमो.