१. कम्मनिरोधसुत्तवण्णना

१४६. नवपुराणवग्गस्स पठमे नवपुराणानीति नवानि च पुराणानि च. चक्खु, भिक्खवे, पुराणकम्मन्ति न चक्खु पुराणं, कम्ममेव पुराणं, कम्मतो पन निब्बत्तत्ता पच्चयनामेन एवं वुत्तं. अभिसङ्खतन्ति पच्चयेहि अभिसमागन्त्वा कतं. अभिसञ्चेतयितन्ति चेतनाय पकप्पितं. वेदनियं दट्ठब्बन्ति वेदनाय वत्थूति पस्सितब्बं. निरोधा विमुत्तिं फुसतीति इमस्स तिविधस्स कम्मस्स निरोधेन विमुत्तिं फुसति. अयं वुच्चतीति अयं तस्सा विमुत्तिया आरम्मणभूतो निरोधो कम्मनिरोधोति वुच्चति. इति इमस्मिं सुत्ते पुब्बभागविपस्सना कथिता.