१५. नवपुराणवग्गो

१. कम्मनिरोधसुत्तवण्णना

१४६. नवपुराणवग्गस्स पठमे नवपुराणानीति नवानि च पुराणानि च. चक्खु, भिक्खवे, पुराणकम्मन्ति न चक्खु पुराणं, कम्ममेव पुराणं, कम्मतो पन निब्बत्तत्ता पच्चयनामेन एवं वुत्तं. अभिसङ्खतन्ति पच्चयेहि अभिसमागन्त्वा कतं. अभिसञ्चेतयितन्ति चेतनाय पकप्पितं. वेदनियं दट्ठब्बन्ति वेदनाय वत्थूति पस्सितब्बं. निरोधा विमुत्तिं फुसतीति इमस्स तिविधस्स कम्मस्स निरोधेन विमुत्तिं फुसति. अयं वुच्चतीति अयं तस्सा विमुत्तिया आरम्मणभूतो निरोधो कम्मनिरोधोति वुच्चति. इति इमस्मिं सुत्ते पुब्बभागविपस्सना कथिता.

२-५. अनिच्चनिब्बानसप्पायसुत्तादिवण्णना

१४७-१५०. दुतिये निब्बानसप्पायन्ति निब्बानस्स सप्पायं उपकारपटिपदं. ततियादीसुपि एसेव नयो. पटिपाटिया पन चतूसुपि एतेसु सुत्तेसु सह विपस्सनाय चत्तारो मग्गा कथिता.

६-७. अन्तेवासिकसुत्तादिवण्णना

१५१-१५२. छट्ठे अनन्तेवासिकन्ति अन्तो वसनककिलेसविरहितं. अनाचरियकन्ति आचरणककिलेसविरहितं. अन्तस्स वसन्तीति अन्तो अस्स वसन्ति. ते नं समुदाचरन्तीति ते एतं अधिभवन्ति अज्झोत्थरन्ति सिक्खापेन्ति वा. ‘‘एवं वेज्जकम्मं करोहि, एवं दूतकम्म’’न्ति इति सिक्खापनसङ्खातेन समुदाचरणत्थेनस्स ते आचरिया नाम होन्ति, तेहि आचरियेहि साचरियकोति वुच्चति. सेसमेत्थ वुत्तनयेनेव वेदितब्बं. सत्तमं हेट्ठा कथितनयमेव.

८. अत्थिनुखोपरियायसुत्तवण्णना

१५३. अट्ठमे यं परियायं आगम्माति यं कारणं आगम्म. अञ्ञत्रेव सद्धायाति विना सद्धाय सद्धं अपनेत्वा. एत्थ च सद्धाति न पच्चक्खा सद्धा. यो पन परस्स एवं किर एवं किराति कथेन्तस्स सुत्वा उप्पन्नो सद्दहनाकारो, तं सन्धायेतं वुत्तं. रुचिआदीसुपि रुचापेत्वा खमापेत्वा अत्थेतन्ति गहणाकारो रुचि नाम, एवं किर भविस्सतीति अनुस्सवनं अनुस्सवो, निसीदित्वा एकं कारणं चिन्तेन्तस्स कारणं उपट्ठाति, एवं उपट्ठितस्स अत्थेतन्ति गहणं आकारपरिवितक्को नाम, कारणवितक्कोति अत्थो. कारणं चिन्तेन्तस्स पापिका लद्धि उप्पज्जति, तं अत्थेसाति गहणाकारो दिट्ठिनिज्झानक्खन्ति नाम. अञ्ञं ब्याकरेय्याति इमानि पञ्च ठानानि मुञ्चित्वा अरहत्तं ब्याकरेय्य. इमस्मिं सुत्ते सेखासेखानं पच्चवेक्खणा कथिता.

९-१०. इन्द्रियसम्पन्नसुत्तादिवण्णना

१५४-१५५. नवमे इन्द्रियसम्पन्नोति परिपुण्णिन्द्रियो. तत्थ येन छ इन्द्रियानि सम्मसित्वा अरहत्तं पत्तं, सो तेहि निब्बिसेवनेहि इन्द्रियेहि समन्नागतत्ता, चक्खादीनि वा छ इन्द्रियानि सम्मसन्तस्स उप्पन्नेहि सद्धादीहि इन्द्रियेहि समन्नागतत्ता परिपुण्णिन्द्रियो नाम होति, तं सन्धाय भगवा चक्खुन्द्रिये चेतिआदिना नयेन देसनं वित्थारेत्वा एत्तावता खो भिक्खु इन्द्रियसम्पन्नो होतीति आह. दसमं हेट्ठा वुत्तनयमेवाति.

नवपुराणवग्गो पञ्चदसमो.

ततियो पण्णासको.