१. उपयसुत्तवण्णना

५३. उपयवग्गस्स पठमे उपयोति तण्हामानदिट्ठिवसेन पञ्चक्खन्धे उपगतो. विञ्ञाणन्ति कम्मविञ्ञाणं. आपज्जेय्याति कम्मं जवापेत्वा पटिसन्धिआकड्ढनसमत्थताय वुद्धिआदीनि आपज्जेय्य. विञ्ञाणुपयन्ति पदस्स अग्गहणे कारणं वुत्तमेव. वोच्छिज्जतारम्मणन्ति पटिसन्धिआकड्ढनसमत्थताय अभावेन आरम्मणं वोच्छिज्जति. पतिट्ठा विञ्ञाणस्साति कम्मविञ्ञाणस्स पतिट्ठा न होति. तदप्पतिट्ठितन्ति तं अप्पतिट्ठितं. अनभिसङ्खच्च विमुत्तन्ति पटिसन्धिं अनभिसङ्खरित्वा विमुत्तं. पठमं.