२. पटिपदासुत्तवण्णना

४४. दुतिये दुक्खसमुदयगामिनी समनुपस्सनाति यस्मा सक्कायो दुक्खं, तस्स च समुदयगामिनी पटिपदा नाम ‘‘रूपं अत्ततो समनुपस्सती’’ति एवं दिट्ठिसमनुपस्सना वुत्ता, तस्मा दुक्खसमुदयगामिनी समनुपस्सनाति अयमेत्थ अत्थो होति. दुक्खनिरोधगामिनी समनुपस्सनाति एत्थ सह विपस्सनाय चतुमग्गञाणं ‘‘समनुपस्सना’’ति वुत्तं. इति इमस्मिं सुत्ते वट्टविवट्टं कथितं. दुतियं.