१०. सीलवन्तसुत्तवण्णना

१२२. दसमे अनिच्चतोतिआदीसु हुत्वा अभावाकारेन अनिच्चतो, पटिपीळनाकारेन दुक्खतो, आबाधट्ठेन रोगतो, अन्तोदोसट्ठेन गण्डतो, तेसं तेसं गण्डानं पच्चयभावेन वा खणनट्ठेन वा सल्लतो दुक्खट्ठेन अघतो, विसभागमहाभूतसमुट्ठानआबाधपच्चयट्ठेन आबाधतो, असकट्ठेन परतो, पलुज्जनट्ठेन पलोकतो, सत्तसुञ्ञतट्ठेन सुञ्ञतो, अत्ताभावेन अनत्ततो. एवमेत्थ ‘‘अनिच्चतो पलोकतो’’ति द्वीहि पदेहि अनिच्चमनसिकारो, ‘‘सुञ्ञतो अनत्ततो’’ति द्वीहि अनत्तमनसिकारो, सेसेहि दुक्खमनसिकारो वुत्तोति वेदितब्बो. सेसमेत्थ उत्तानमेव. दसमं.