२. बळिससुत्तवण्णना

१५८. दुतिये बाळिसिकोति बळिसं गहेत्वा चरमानो मच्छघातको. आमिसगतन्ति आमिसमक्खितं. आमिसचक्खूति आमिसे चक्खु दस्सनं अस्साति आमिसचक्खु. गिलबळिसोति गिलितबळिसो. अनयं आपन्नोति दुक्खं पत्तो. ब्यसनं आपन्नोति विनासं पत्तो. यथाकामकरणीयोति यथाकामेन यथारुचिया यथेव नं बाळिसिको इच्छति, तथेवस्स कत्तब्बोति अत्थो. यथाकामकरणीयो पापिमतोति यथा किलेसमारस्स कामो, एवं कत्तब्बो, निरयं वा तिरच्छानयोनिं वा पेत्तिविसयं वा पापेतब्बो. दुतियं.