३. तिंसमत्तसुत्तवण्णना

१३६. ततिये पावेय्यकाति पावेय्यदेसवासिनो. सब्बे आरञ्ञिकातिआदीसु धुतङ्गसमादानवसेन तेसं आरञ्ञिकादिभावो वेदितब्बो. सब्बे ससंयोजनाति सब्बे सबन्धना, केचि सोतापन्ना, केचि सकदागामिनो, केचि अनागामिनो. तेसु हि पुथुज्जनो वा खीणासवो वा नत्थि. गुन्नन्तिआदीसु सेतकाळादिवण्णेसु एकेकवण्णकालोव गहेतब्बो. पारिपन्थकाति परिपन्थे तिट्ठनका पन्थघातचोरा. पारदारिकाति परदारचारित्तं आपज्जनका. ततियं.