३. दुक्खसुत्तवण्णना

४३. ततिये दुक्खस्साति वट्टदुक्खस्स. समुदयन्ति द्वे समुदया खणिकसमुदयो च पच्चयसमुदयो च. पच्चयसमुदयं पस्सन्तोपि भिक्खु खणिकसमुदयं पस्सति, खणिकसमुदयं पस्सन्तोपि पच्चयसमुदयं पस्सति. अत्थङ्गमोपि अच्चन्तत्थङ्गमो भेदत्थङ्गमोति दुविधो. अच्चन्तत्थङ्गमं पस्सन्तोपि भेदत्थङ्गमं पस्सति, भेदत्थङ्गमं पस्सन्तोपि अच्चन्तत्थङ्गमं पस्सति. देसेस्सामीति इदं वट्टदुक्खस्स समुदयअत्थङ्गमं निब्बत्तिभेदं नाम देसेस्सामि, तं सुणाथाति अत्थो. पटिच्चाति निस्सयवसेन चेव आरम्मणवसेन च पच्चयं कत्वा. तिण्णं सङ्गति फस्सोति तिण्णं सङ्गतिया फस्सो. अयं खो, भिक्खवे, दुक्खस्स समुदयोति अयं वट्टदुक्खस्स निब्बत्ति नाम. अत्थङ्गमोति भेदो. एवञ्हि वट्टदुक्खं भिन्नं होति अप्पटिसन्धियं. ततियं.