१०. एणिजङ्घसुत्तवण्णना

३०. दसमे एणिजङ्घन्ति एणिमिगस्स विय सुवट्टितजङ्घं. किसन्ति अथूलं समसरीरं. अथ वा आतपेन मिलातं मालागन्धविलेपनेहि अनुपब्रूहितसरीरन्तिपि अत्थो. वीरन्ति वीरियवन्तं. अप्पाहारन्ति भोजने मत्तञ्ञुताय मिताहारं, विकालभोजनपटिक्खेपवसेन वा परित्ताहारं. अलोलुपन्ति चतूसु पच्चयेसु लोलुप्पविरहितं. रसतण्हापटिक्खेपो वा एस. सीहंवेकचरं नागन्ति एकचरं सीहं विय, एकचरं नागं विय. गणवासिनो हि पमत्ता होन्ति, एकचरा अप्पमत्ता, तस्मा एकचराव गहिताति. पवेदिताति पकासिता कथिता. एत्थाति एतस्मिं नामरूपे. पञ्चकामगुणवसेन हि रूपं गहितं, मनेन नामं, उभयेहि पन अविनिभुत्तधम्मे गहेत्वा पञ्चक्खन्धादिवसेनपेत्थ भुम्मं योजेतब्बन्ति. दसमं.

सत्तिवग्गो ततियो.