३९. अत्थसन्दस्सनञाणनिद्देसवण्णना

९०. अत्थसन्दस्सनञाणनिद्देसे पञ्चक्खन्धातिआदीनि वुत्तत्थानेव. पकासेतीति पाकटं करोति, सोतूनं ञाणचक्खुना दस्सनं सम्पादेतीति अत्थो. नानाधम्माति लोकियलोकुत्तरा सब्बधम्मा वुत्ता. कस्मा पकासनानिद्देसे लोकिया एव वुत्ताति चे? अनिच्चादिवसेन पकासनाय आरद्धत्ता. लोकुत्तरानञ्च असम्मसनूपगत्ता लोकुत्तरा न वुत्ता. नानाधम्मनिद्देसेन पन अत्थसन्दस्सननिद्देसेन च तेसं सङ्गहितत्ता यथा ते पकासेतब्बा, तथा पकासना पकासनायेव. पजहन्तोति सोतारं पजहापेन्तोति अत्थो. सन्दस्सेतीति सोतूनं सम्मा दस्सेति. केचि पन ‘‘कामच्छन्दस्स पहीनत्ता नेक्खम्मत्थं सन्दस्सेती’’तिआदिना नयेन पठन्ति. तेसं उजुकमेव सोतूनं दोसप्पहाने गुणपटिलाभे च कते सिखाप्पत्तं देसनाञाणं होतीति दस्सनत्थं अयं नयो वुत्तोति वेदितब्बो.

अत्थसन्दस्सनञाणनिद्देसवण्णना निट्ठिता.