२०-२४. ञाणपञ्चकनिद्देसवण्णना

७५. ञाणपञ्चकनिद्देसे तेसं पञ्चन्नं ञाणानं अनुपुब्बसम्बन्धसब्भावतो एकतोव पुच्छाविस्सज्जनानि कतानि. अभिञ्ञाता होन्तीति धम्मसभावलक्खणजाननवसेन सुट्ठु ञाता होन्ति. ञाता होन्तीति ञातपरिञ्ञावसेन सभावतो ञातत्ता ञाता नाम होन्ति. येन ञाणेन ते धम्मा ञाता होन्ति, तं ञातट्ठेन ञाणं, पजाननट्ठेन पञ्ञाति सम्बन्धो. इमिनाव नयेन सेसञाणानिपि योजेतब्बानि. परिञ्ञाता होन्तीति सामञ्ञलक्खणवसेन समन्ततो ञाता होन्ति. तीरिता होन्तीति तीरणपरिञ्ञावसेन अनिच्चादितो उपपरिक्खिता समापिता नाम होन्ति. पहीना होन्तीति अनिच्चानुपस्सनादिना ञाणेन निच्चसञ्ञादयो भङ्गानुपस्सनतो पट्ठाय पहीना होन्ति. परिच्चत्ता होन्तीति पहानवसेनेव छड्डिता नाम होन्ति. भाविता होन्तीति वड्ढिता परिभाविता च होन्ति. एकरसा होन्तीति सकिच्चसाधनपटिपक्खपहानेन एककिच्चा होन्ति, पच्चनीकतो वा विमुत्तिवसेन विमुत्तिरसेन एकरसा होन्ति. सच्छिकता होन्तीति पटिलाभवसेन फलधम्मो पटिवेधवसेन निब्बानधम्मोति पच्चक्खकता होन्ति. फस्सिता होन्तीति पटिलाभफुसनेन पटिवेधफुसनेन च फस्सिता अनुभूता होन्ति. इमानि पञ्च ञाणानि हेट्ठा सुतमयञाणवसेन वुत्तानि, इध सकिच्चसाधनवसेन.

ञाणपञ्चकनिद्देसवण्णना निट्ठिता.