सततविहारछक्कवण्णना

३२८. सततविहाराति खीणासवस्स निच्चविहारा. चक्खुना रूपं दिस्वाति चक्खुद्वारारम्मणे आपाथगते तं रूपं चक्खुविञ्ञाणेन दिस्वा जवनक्खणे इट्ठे अरज्जन्तो नेव सुमनो होति, अनिट्ठे अदुस्सन्तो न दुम्मनो. असमपेक्खने मोहं अनुप्पादेन्तो उपेक्खको विहरति मज्झत्तो, सतिया युत्तत्ता सतो, सम्पजञ्ञेन युत्तत्ता सम्पजानो. सेसपदेसुपि एसेव नयो. इति छसुपि द्वारेसु उपेक्खको विहरतीति इमिना छळङ्गुपेक्खा कथिता. सम्पजानोति वचनतो पन चत्तारि ञाणसम्पयुत्तचित्तानि लब्भन्ति. सततविहाराति वचनतो अट्ठपि महाचित्तानि लब्भन्ति अरज्जन्तो अदुस्सन्तोति वचनतो दसपि चित्तानि लब्भन्ति. सोमनस्सं कथं लब्भतीति चे आसेवनतो लब्भति.