बुद्धसरीरपूजावण्णना

२२७. सब्बञ्च ताळावचरन्ति सब्बं तूरियभण्डं. सन्निपातेथाति भेरिं चरापेत्वा समाहरथ. ते तथेव अकंसु. मण्डलमाळेति दुस्समण्डलमाळे. पटियादेन्ताति सज्जेन्ता.

दक्खिणेन दक्खिणन्ति नगरस्स दक्खिणदिसाभागेनेव दक्खिणदिसाभागं. बाहिरेन बाहिरन्ति अन्तोनगरं अप्पवेसेत्वा बाहिरेनेव नगरस्स बाहिरपस्सं हरित्वा. दक्खिणतो नगरस्साति अनुराधपुरस्स दक्खिणद्वारसदिसे ठाने ठपेत्वा सक्कारसम्मानं कत्वा जेतवनसदिसे ठाने झापेस्सामाति अत्थो.

२२८. अट्ठ मल्लपामोक्खाति मज्झिमवया थामसम्पन्ना अट्ठमल्लराजानो. सीसं न्हाताति सीसं धोवित्वा नहाता. आयस्मन्तं अनुरुद्धन्ति थेरोव दिब्बचक्खुकोति पाकटो, तस्मा ते सन्तेसुपि अञ्ञेसु महाथेरेसु – ‘‘अयं नो पाकटं कत्वा कथेस्सती’’ति थेरं पुच्छिंसु. कथं पन, भन्ते, देवतानं अधिप्पायोति भन्ते, अम्हाकं ताव अधिप्पायं जानाम. देवतानं कथं अधिप्पायोति पुच्छन्ति. थेरो पठमं तेसं अधिप्पायं दस्सेन्तो तुम्हाकं खोतिआदिमाह. मकुटबन्धनं नाम मल्लानं चेतियन्ति मल्लराजूनं पसाधनमङ्गलसालाय एतं नामं. चित्तीकतट्ठेन पनेसा ‘‘चेतिय’’न्ति वुच्चति.

२२९. याव सन्धिसमलसङ्कटीराति एत्थ सन्धि नाम घरसन्धि. समलं नाम गूथरासिनिद्धमनपनाळि. सङ्कटीरं नाम सङ्कारट्ठानं. दिब्बेहि च मानुसकेहि च नच्चेहीति उपरि देवतानं नच्चानि होन्ति, हेट्ठा मनुस्सानं. एस नयो गीतादीसु. अपिच देवतानं अन्तरे मनुस्सा, मनुस्सानं अन्तरे देवताति एवम्पि सक्करोन्ता पूजेन्ता अगमंसु. मज्झेन मज्झं नगरस्स हरित्वाति एवं हरियमाने भगवतो सरीरे बन्धुलमल्लसेनापतिभरिया मल्लिका नाम – ‘‘भगवतो सरीरं आहरन्ती’’ति सुत्वा अत्तनो सामिकस्स कालं किरियतो पट्ठाय अपरिभुञ्जित्वा ठपितं विसाखाय पसाधनसदिसं महालतापसाधनं नीहरापेत्वा – ‘‘इमिना सत्थारं पूजेस्सामी’’ति तं मज्जापेत्वा गन्धोदकेन धोवित्वा द्वारे ठिता.

तं किर पसाधनं तासञ्च द्विन्नं इत्थीनं, देवदानियचोरस्स गेहेति तीसुयेव ठानेसु अहोसि. सा च सत्थु सरीरे द्वारं सम्पत्ते – ‘‘ओतारेथ, ताता, सत्थुसरीर’’न्ति वत्वा तं पसाधनं सत्थुसरीरे पटिमुञ्चि. तं सीसतो पट्ठाय पटिमुक्कं यावपादतलागतं. सुवण्णवण्णं भगवतो सरीरं सत्तरतनमयेन महापसाधनेन पसाधितं अतिविय विरोचित्थ. तं सा दिस्वा पसन्नचित्ता पत्थनं अकासि – ‘‘भगवा याव वट्टे संसरिस्सामि, ताव मे पाटियेक्कं पसाधनकिच्चं मा होतु, निच्चं पटिमुक्कपसाधनसदिसमेव सरीरं होतू’’ति.

अथ भगवन्तं सत्तरतनमयेन महापसाधनेन उक्खिपित्वा पुरत्थिमेन द्वारेन नीहरित्वा पुरत्थिमेन नगरस्स मकुटबन्धनं मल्लानं चेतियं, एत्थ भगवतो सरीरं निक्खिपिंसु.