थूपारहपुग्गलवण्णना

२०६. राजा चक्कवत्तीति एत्थ कस्मा भगवा अगारमज्झे वसित्वा कालङ्कतस्स रञ्ञो थूपारहतं अनुजानाति, न सीलवतो पुथुज्जनस्स भिक्खुस्साति? अनच्छरियत्ता. पुथुज्जनभिक्खूनञ्हि थूपे अनुञ्ञायमाने तम्बपण्णिदीपे ताव थूपानं ओकासो न भवेय्य, तथा अञ्ञेसु ठानेसु. तस्मा ‘‘अनच्छरिया ते भविस्सन्ती’’ति नानुजानाति. राजा चक्कवत्ती एकोव निब्बत्तति, तेनस्स थूपो अच्छरियो होति. पुथुज्जनसीलवतो पन परिनिब्बुतभिक्खुनो विय महन्तम्पि सक्कारं कातुं वट्टतियेव.