८. पतिरूपकथावण्णना

९१५-९१६. इदानि रागपतिरूपकथा नाम होति. तत्थ मेत्ताकरुणामुदितायो सन्धाय ‘‘न रागो रागपतिरूपको’’ति च इस्सामच्छरियकुक्कुच्चानि सन्धाय ‘‘न दोसो दोसपतिरूपको’’ति च हसितुप्पादं सन्धाय ‘‘न मोहो मोहपतिरूपको’’ति च दुम्मङ्कूनं पुग्गलानं निग्गहं पेसलानं भिक्खूनं अनुग्गहं पापगरहितं कल्याणपसंसं आयस्मतो पिलिन्दवच्छस्स वसलवादं भगवतो खेळासकवादं मोघपुरिसवादञ्च सन्धाय ‘‘न किलेसो किलेसपतिरूपको’’ति च येसं लद्धि, सेय्यथापि अन्धकानं; ते सन्धाय सब्बकथासु पुच्छा सकवादिस्स, पटिञ्ञा इतरस्स. अथ नं यस्मा फस्सादिपतिरूपका नफस्सादयो नाम नत्थि, तस्मा रागादिपतिरूपका नरागादयोपि नत्थीति चोदेतुं अत्थि न फस्सोतिआदिमाह. इतरो तेसं अभावा पटिक्खिपति. सेसं सब्बत्थ उत्तानत्थमेवाति.

पतिरूपकथावण्णना.