५. रूपं हेतूतिकथावण्णना

७५४-७५६. इदानि रूपं हेतूति कथानाम होति. तत्थ हेतूति कुसलमूलादिनो हेतुहेतुस्सापि नामं, यस्स कस्सचि पच्चयस्सापि. इमं पन विभागं अकत्वा ‘‘चत्तारो महाभूता हेतू’’ति वचनमत्तं निस्साय अविसेसेनेव रूपं हेतूति येसं लद्धि, सेय्यथापि उत्तरापथकानं; ते सन्धाय पुच्छा सकवादिस्स, पटिञ्ञा इतरस्स. अलोभो हेतूति किं ते रूपं अलोभसङ्खातो हेतूति पुच्छति, इतरो पटिक्खिपति. सेसेसुपि एसेव नयो. महाभूता उपादायरूपानं उपादायहेतूति एत्थ पच्चयट्ठेन हेतुभावो वुत्तो, न मूलट्ठेन, तस्मा असाधकन्ति.

रूपं हेतूतिकथावण्णना.

७५७-७५९. सहेतुककथायम्पि इमिनाव नयेन अत्थो वेदितब्बोति.

रूपं सहेतुकन्तिकथावण्णना.