२. सळायतनुप्पत्तिकथावण्णना

६९१-६९२. इदानि सळायतनुप्पत्तिकथा नाम होति. तत्थ उपपत्तेसियेन पटिसन्धिचित्तेन सहेव ओपपातिकानं सळायतनं उप्पज्जति. गब्भसेय्यकानं अज्झत्तिकायतनेसु मनायतनकायायतनानेव पटिसन्धिक्खणे उप्पज्जन्ति. सेसानि चत्तारि सत्तसत्ततिरत्तिम्हि. तानि च खो येन कम्मुना पटिसन्धि गहिता, तस्सेव अञ्ञस्स वा कतत्ताति अयं सकसमये वादो. येसं पन एककम्मसम्भवत्ता सम्पन्नसाखाविटपानं रुक्खादीनं अंकुरो विय बीजमत्तं सळायतनं मातुकुच्छिस्मिं पटिसन्धिक्खणेयेव उप्पज्जतीति लद्धि, सेय्यथापि पुब्बसेलियानं; ते सन्धाय सळायतनन्ति पुच्छा सकवादिस्स, पटिञ्ञा इतरस्स. सब्बङ्गपच्चङ्गीतिआदि सळायतने सति एवरूपो हुत्वा ओक्कमेय्याति चोदनत्थं वुत्तं. मातुकुच्छिगतस्साति पुच्छा परवादिस्स. परतो मातुकुच्छिगतस्स पच्छा केसाति पुच्छा सकवादिस्स. सेसमेत्थ उत्तानत्थमेवाति.

सळायतनुप्पत्तिकथावण्णना.