१०. विञ्ञत्ति सीलन्तिकथावण्णना

६०१-६०२. इदानि विञ्ञत्ति सीलन्तिकथा नाम होति. तत्थ कायविञ्ञत्ति कायकम्मं, वचीविञ्ञत्ति वचीकम्मन्ति गहितत्ता ‘‘विञ्ञत्ति सील’’न्ति येसं लद्धि, सेय्यथापि महासंघिकानञ्चेव सम्मितियानञ्च; ते सन्धाय विञ्ञत्तीति पुच्छा सकवादिस्स, पटिञ्ञा इतरस्स. अथ नं यस्मा सीलं नाम विरति, न रूपधम्मो, तस्मा तेनत्थेन चोदेतुं पाणातिपाता वेरमणीतिआदिमाह. अभिवादनं सीलन्तिआदि यथारूपं विञ्ञत्तिं सो ‘‘सील’’न्ति मञ्ञति तं उद्धरित्वा दस्सेतुं वुत्तं. यस्मा पन सा विरति न होति, तस्मा पुन पाणातिपातातिआदिमाह. लद्धि पनस्स छलेन पतिट्ठितत्ता अप्पतिट्ठितायेवाति.

विञ्ञत्ति सीलन्तिकथावण्णना.