४. अनुसया अनारम्मणकथावण्णना

५५४-५५६. इदानि अनुसया अनारम्मणातिकथा नाम होति. तत्थ येसं अनुसया नाम चित्तविप्पयुत्ता अहेतुका अब्याकता, तेनेव च अनारम्मणाति लद्धि, सेय्यथापि अन्धकानञ्चेव एकच्चानञ्च उत्तरापथकानं; ते सन्धाय अनुसयाति पुच्छा सकवादिस्स, पटिञ्ञा इतरस्स. अथ नं अनारम्मणेन नाम एवंविधेन भवितब्बन्ति चोदेतुं रूपन्तिआदिमाह. कामरागोतिआदि कामरागानुसयतो अनञ्ञत्ता दस्सितं. सङ्खारक्खन्धो अनारम्मणोति पञ्हे चित्तसम्पयुत्तसङ्खारक्खन्धं सन्धाय पटिक्खिपति. अनुसयं जीवितिन्द्रियं कायकम्मादिरूपञ्च सङ्खारक्खन्धपरियापन्नं, तं सन्धाय पटिजानाति. इमिनावुपायेन सब्बवारेसु अत्थो वेदितब्बो. सानुसयोति पञ्हे पन अप्पहीनानुसयत्ता सानुसयता अनुञ्ञाता. न अनुसयानं पवत्तिसब्भावा. यो हि अप्पहीनो, न सो अतीतो, नानागतो, न पच्चुप्पन्नो च. मग्गवज्झकिलेसो पनेस अप्पहीनत्ताव अत्थीति वुच्चति. एवरूपस्स च इदं नाम आरम्मणन्ति न वत्तब्बं. तस्मा तं पटिक्खित्तं. तं पनेतं न केवलं अनुसयस्स, रागादीनम्पि तादिसमेव, तस्मा अनुसयानं अनारम्मणतासाधकं न होतीति.

अनुसया अनारम्मणातिकथावण्णना.