३. चेतसिककथावण्णना

४७५-४७७. इदानि चेतसिककथा नाम होति. तत्थ यस्मा फस्सिकादयो नाम नत्थि, तस्मा ‘‘चेतसिकेनापि न भवितब्बं, इति नत्थि चेतसिको धम्मो’’ति येसं लद्धि, सेय्यथापि राजगिरिकसिद्धत्थिकानं; ते सन्धाय पुच्छा सकवादिस्स, पटिञ्ञा इतरस्स. सहजातोति सम्पयुत्तसहजातं सन्धाय वुत्तं. फस्सिकाति तादिसं वोहारं अपस्सन्तस्स पुच्छा परवादिस्स. किं वोहारेन, यथा चित्तनिस्सितकोति चेतसिको, एवं सोपि फस्सनिस्सितत्ता फस्सिकोति वुत्ते दोसो नत्थीति पटिञ्ञा सकवादिस्स. सेसं उत्तानत्थमेवाति.

चेतसिककथावण्णना.