६. आकासकथावण्णना

४६०-४६२. इदानि आकासकथा नाम होति. तत्थ तिविधो आकासो – परिच्छेदाकासो, कसिणुग्घाटिमाकासो, अजटाकासो. ‘‘तुच्छाकासो’’तिपि तस्सेव नामं. तेसु परिच्छेदाकासो सङ्खतो, इतरे द्वे पञ्ञत्तिमत्ता. येसं पन ‘‘दुविधोपि यस्मा सङ्खतो न होति, तस्मा असङ्खतो’’ति लद्धि, सेय्यथापि उत्तरापथकानं महिसासकानञ्च; ते सन्धाय आकासोति पुच्छा सकवादिस्स, पटिञ्ञा इतरस्स. सेसमेत्थ उत्तानत्थमेवाति.

आकासकथावण्णना.