३. अनासवकथावण्णना

३९१. इदानि अनासवकथा नाम होति. तत्थ ये धम्मा अनासवस्स अरहतो, सब्बे ते अनासवाति येसं लद्धि, सेय्यथापि एतरहि उत्तरापथकानं; ते सन्धाय अरहतोति पुच्छा सकवादिस्स, पटिञ्ञा इतरस्स. अथ नं अनासवा नाम मग्गादयो, किं तस्स तेयेव उप्पज्जन्तीति चोदनत्थं मग्गो फलन्तिआदि आरद्धं. चक्खु अनासवन्ति पुट्ठो तस्स सासवत्ता पटिक्खिपति. दुतियं पुट्ठो अनासवस्सेतन्ति पटिजानाति.

३९२. चीवरपञ्हे एकोव धम्मो अनासवो सासवो च होतीति लक्खणविरोधभया पटिक्खिपति. दुतियं पुट्ठो अनासवस्स हुत्वा सासवस्स होतीति पटिजानाति. तञ्ञेव अनासवन्ति पञ्हाद्वयेपि एसेव नयो. सकवादी पन तञ्ञेवाति अनुञ्ञातत्ता ‘‘मग्गो अनासवो हुत्वा’’तिआदीहि चोदेति. इमिना उपायेन सब्बत्थ अत्थो वेदितब्बोति.

अनासवकथावण्णना.