८. इन्द्रियसंवरसुत्तवण्णना

५०. अट्ठमे हतूपनिसं होतीति हतूपनिस्सयं होति. सीलविपन्नस्साति विपन्नसीलस्स. यथाभूतञाणदस्सनन्ति तरुणविपस्सनाञाणं. निब्बिदाविरागोति एत्थ निब्बिदा बलवविपस्सना, विरागो अरियमग्गो. विमुत्तिञाणदस्सनन्ति एत्थ विमुत्तीति अरहत्तफलं, ञाणदस्सनन्ति पच्चवेक्खणञाणं. उपनिस्सयसम्पन्नं होतीति सम्पन्नउपनिस्सयं होति. इमस्मिं सुत्ते सीलानुरक्खणइन्द्रियसंवरो कथितो.