१. सोणसुत्तवण्णना

१९१. पञ्चमस्स पठमे ब्राह्मणधम्माति ब्राह्मणसभावा. सुनखेसूति कुक्कुरेसु. नेव किणन्ति न विक्किणन्तीति न गण्हन्ता किणन्ति, न ददन्ता विक्किणन्ति. सम्पियेनेव संवासं संबन्धाय सम्पवत्तेन्तीति पियो पियं उपसङ्कमित्वा पवेणिया बन्धनत्थं संवासं पवत्तयन्ति. उदरावदेहकन्ति उदरं अवदिहित्वा उपचिनित्वा पूरेत्वा. अवसेसं आदाय पक्कमन्तीति यं भुञ्जितुं न सक्कोन्ति, तं भण्डिकं कत्वा गहेत्वा गच्छन्ति. इमस्मिं सुत्ते वट्टमेव कथितं.