९. अक्खमसुत्तवण्णना

१३९. नवमे हत्थिकायन्ति हत्थिघटं. सेसेसुपि एसेव नयो. सङ्गामे अवचरन्तीति सङ्गामावचरा. एकिस्सा वा तिणोदकदत्तिया विमानितोति एकदिवसं एकेन तिणोदकदानेन विमानितो, एकदिवसमत्तं अलद्धतिणोदकोति अत्थो. इतो परम्पि एसेव नयो. न सक्कोति चित्तं समादहितुन्ति आरम्मणे चित्तं सम्मा ठपेतुं न सक्कोति. सेसमेत्थ उत्तानमेव. इमस्मिं पन सुत्ते वट्टविवट्टं कथितन्ति वेदितब्बं.