९. चङ्कमसुत्तवण्णना

२९. नवमे अद्धानक्खमो होतीति दूरं अद्धानमग्गं गच्छन्तो खमति, अधिवासेतुं सक्कोति. पधानक्खमोति वीरियक्खमो. चङ्कमाधिगतो समाधीति चङ्कमं अधिट्ठहन्तेन अधिगतो अट्ठन्नं समापत्तीनं अञ्ञतरसमाधि. चिरट्ठितिको होतीति चिरं तिट्ठति. ठितकेन गहितनिमित्तञ्हि निसिन्नस्स नस्सति, निसिन्नेन गहितनिमित्तं निपन्नस्स. चङ्कमं अधिट्ठहन्तेन चलितारम्मणे गहितनिमित्तं पन ठितस्सपि निसिन्नस्सपि निपन्नस्सपि न नस्सतीति.