२. आपत्तिभयसुत्तवण्णना

२४४. दुतिये खुरमुण्डं करित्वाति पञ्च सिखण्डके ठपेत्वा खुरेन मुण्डं करित्वा. खरस्सरेनाति कक्खळसद्देन. पणवेनाति वज्झभेरिया. थलट्ठस्साति एकमन्ते ठितस्स. सीसच्छेज्जन्ति सीसच्छेदारहं. यत्र हि नामाति यं नाम. सो वतस्साहन्ति सो वत अहं अस्सं, यं एवरूपं पापं न करेय्यन्ति अत्थो. यथाधम्मं पटिकरिस्सतीति धम्मानुरूपं पटिकरिस्सति, सामणेरभूमियं ठस्सतीति अत्थो. काळवत्थं परिधायाति काळपिलोतिकं निवासेत्वा. मोसल्लन्ति मुसलाभिपातारहं. यथाधम्मन्ति इध आपत्तितो वुट्ठाय सुद्धन्ते पतिट्ठहन्तो यथाधम्मं करोति नाम. भस्मपुटन्ति छारिकाभण्डिकं. गारय्हं भस्मपुटन्ति गरहितब्बछारिकापुटेन मत्थके अभिघातारहं. यथाधम्मन्ति इध आपत्तिं देसेन्तो यथाधम्मं पटिकरोति नाम. उपवज्जन्ति उपवादारहं. पाटिदेसनीयेसूति पटिदेसेतब्बेसु. इमिना सब्बापि सेसापत्तियो सङ्गहिता. इमानि खो, भिक्खवे, चत्तारि आपत्तिभयानीति, भिक्खवे, इमानि चत्तारि आपत्तिं निस्साय उप्पज्जनकभयानि नामाति.