९. सच्छिकरणीयसुत्तवण्णना

१८९. नवमे कायेनाति नामकायेन. सच्छिकरणीयाति पच्चक्खं कातब्बा. सतियाति पुब्बेनिवासानुस्सतिया. चक्खुनाति दिब्बचक्खुना. पञ्ञायाति झानपञ्ञाय विपस्सनापञ्ञा सच्छिकातब्बा, विपस्सनापञ्ञाय मग्गपञ्ञा, मग्गपञ्ञाय फलपञ्ञा, फलपञ्ञाय पच्चवेक्खणपञ्ञा सच्छिकातब्बा, पत्तब्बाति अत्थो. आसवानं खयसङ्खातं पन अरहत्तं पच्चवेक्खणवसेन पच्चवेक्खणपञ्ञाय सच्छिकरणीयं नामाति.