९. ससङ्खारसुत्तवण्णना

१६९. नवमे पठमदुतियपुग्गला सुक्खविपस्सका ससङ्खारेन सप्पयोगेन सङ्खारनिमित्तं उपट्ठपेन्ति. तेसु एको विपस्सनिन्द्रियानं बलवत्ता इधेव किलेसपरिनिब्बानेन परिनिब्बायति, एको इन्द्रियानं दुब्बलताय इध असक्कोन्तो अनन्तरे अत्तभावे तदेव मूलकम्मट्ठानं पटिलभित्वा ससङ्खारेन सप्पयोगेन सङ्खारनिमित्तं उपट्ठपेत्वा किलेसपरिनिब्बानेन परिनिब्बायति, ततियचतुत्था समथयानिका. तेसं एको असङ्खारेन अप्पयोगेन इन्द्रियानं बलवत्ता इधेव किलेसे खेपेति, एको इन्द्रियानं दुब्बलत्ता इध असक्कोन्तो अनन्तरे अत्तभावे तदेव मूलकम्मट्ठानं पटिलभित्वा असङ्खारेन अप्पयोगेन किलेसे खेपेतीति वेदितब्बो.