४. उट्ठानफलसुत्तवण्णना

१३४. चतुत्थे उट्ठानवीरियेनेव दिवसं वीतिनामेत्वा तस्स निस्सन्दफलमत्तं किञ्चिदेव लभित्वा जीविकं कप्पेति, तं पन उट्ठानं आगम्म किञ्चि पुञ्ञफलं नप्पटिलभति, अयं उट्ठानफलूपजीवी न कम्मफलूपजीवी नाम. चातुमहाराजिके पन देवे आदिं कत्वा सब्बेपि देवा उट्ठानवीरियेन विना पुञ्ञफलस्सेव उपजीवनतो कम्मफलूपजीविनो न उट्ठानफलूपजीविनो नाम. राजराजमहामत्तादयो उट्ठानफलूपजीविनो च कम्मफलूपजीविनो च. नेरयिकसत्ता नेव उट्ठानफलूपजीविनो न कम्मफलूपजीविनो. इमस्मिं सुत्ते पुञ्ञफलमेव कम्मफलन्ति अधिप्पेतं, तञ्च तेसं नत्थि.