१. संयोजनसुत्तवण्णना

१३१. चतुत्थस्स पठमे उपपत्तिपटिलाभियानीति येहि अनन्तरा उपपत्तिं पटिलभति. भवपटिलाभियानीति उपपत्तिभवस्स पटिलाभाय पच्चयानि. सकदागामिस्साति इदं अप्पहीनसंयोजनेसु अरियेसु उत्तमकोटिया गहितं. यस्मा पन अन्तरापरिनिब्बायिस्स अन्तरा उपपत्ति नत्थि, यं पन सो तत्थ झानं समापज्जति, तं कुसलत्ता ‘‘उपपत्तिभवस्स पच्चयो’’ तेव सङ्ख्यं गच्छति. तस्मास्स ‘‘उपपत्तिपटिलाभियानि संयोजनानि पहीनानि, भवपटिलाभियानि संयोजनानि अप्पहीनानी’’ति वुत्तं. ओरम्भागियेसु च अप्पहीनं उपादाय सकदागामिस्स अविसेसेन ‘‘ओरम्भागियानि संयोजनानि अप्पहीनानी’’ति वुत्तं. सेसमेत्थ उत्तानमेव.