७. आरक्खसुत्तवण्णना

११७. सत्तमे अत्तरूपेनाति अत्तनो अनुरूपेन अनुच्छविकेन, हितकामेनाति अत्थो. रजनीयेसूति रागस्स पच्चयभूतेसु. धम्मेसूति सभावेसु, इट्ठारम्मणेसूति अत्थो. एवं सब्बत्थ नयो वेदितब्बो. न रज्जतीति दिट्ठिवसेन न रज्जति. सेसपदेसुपि एसेव नयो. न च पन समणवचनहेतुपि गच्छतीति समणानं परवादीनं वचनहेतुपि अत्तनो दिट्ठिं पहाय तेसं दिट्ठिवसेन न गच्छतीति अत्थो. इधापि खीणासवोव अधिप्पेतो.