९. सम्मादिट्ठिसुत्तवण्णना

८९. नवमे सम्मादिट्ठिकोतिआदीहि अट्ठङ्गिकमग्गवसेन पठमसुत्ते विय सत्त सेखा गहिता. दुतियवारे दसङ्गिकमग्गवसेन वा अरहत्तफलञाणअरहत्तफलविमुत्तीहि सद्धिं, अट्ठङ्गिकमग्गवसेन वा सुक्खविपस्सकखीणासवो कथितो, ततियवारे उभतोभागविमुत्तो, चतुत्थवारे तथागतो च तथागतसदिसखीणासवो चाति. इति इदं सुत्तं पठमसुत्ते कथितपुग्गलानं वसेनेव कथितं, देसनामत्तमेव पनेत्थ नानन्ति.