२. आनण्यसुत्तवण्णना

६२. दुतिये अधिगमनीयानीति पत्तब्बानि. कामभोगिनाति वत्थुकामे च किलेसकामे च परिभुञ्जन्तेन. अत्थिसुखादीसु अत्थीति उप्पज्जनकसुखं अत्थिसुखं नाम. भोगे परिभुञ्जन्तस्स उप्पज्जनकसुखं भोगसुखं नाम. अनणोस्मीति उप्पज्जनकसुखं आनण्यसुखं नाम. निद्दोसो अनवज्जोस्मीति उप्पज्जनकसुखं अनवज्जसुखं नाम.

भुञ्जन्ति भुञ्जमानो. पञ्ञा विपस्सतीति पञ्ञाय विपस्सति. उभो भागेति द्वे कोट्ठासे, हेट्ठिमानि तीणि एकं कोट्ठासं, अनवज्जसुखं एकं कोट्ठासन्ति एवं पञ्ञाय पस्समानो द्वे कोट्ठासे जानातीति अत्थो. अनवज्जसुखस्सेतन्ति एतं तिविधम्पि सुखं अनवज्जसुखस्स सोळसिं कलं नाग्घतीति.