७. सुविदूरसुत्तवण्णना

४७. सत्तमे सुविदूरविदूरानीति केनचि परियायेन अनासन्नानि हुत्वा सुविदूरानेव विदूरानि. नभञ्च, भिक्खवे, पथवी चाति आकासञ्च महापथवी च. तत्थ किञ्चापि पथवितो आकासं नाम न दूरे, द्वङ्गुलमत्तेपि होति. अञ्ञमञ्ञं अलग्गनट्ठेन पन ‘‘सुविदूरविदूरे’’ति वुत्तं. वेरोचनोति सूरियो. सतञ्च, भिक्खवे, धम्मोति चतुसतिपट्ठानादिभेदो सत्ततिंसबोधिपक्खियधम्मो. असतञ्च धम्मोति द्वासट्ठिदिट्ठिगतभेदो अस्सद्धम्मो.

पभङ्करोति आलोककरो. अब्यायिको होतीति अविगच्छनसभावो होति. सतं समागमोति पण्डितानं मित्तसन्थववसेन समागमो. यावापि तिट्ठेय्याति यत्तकं अद्धानं तिट्ठेय्य. तथेव होतीति तादिसोव होति, पकतिं न जहति. खिप्पं हि वेतीति सीघं विगच्छति.