१०. उपक्किलेससुत्तवण्णना

५०. दसमे उपक्किलेसाति विरोचितुं अदत्वा उपक्किलिट्ठभावकरणेन उपक्किलेसा. महिकाति हिमं. धूमो रजोति धूमो च रजो च. राहूति पुरिमा तयो असम्पत्तउपक्किलेसा, राहु पन सम्पत्तउपक्किलेसवसेन कथितोति वेदितब्बो. समणब्राह्मणा न तपन्ति न भासन्ति न विरोचन्तीति गुणप्पतापेन न तपन्ति, गुणोभासेन न भासन्ति, गुणविरोचनेन न विरोचन्ति. सुरामेरयपाना अप्पटिविरताति पञ्चविधाय सुराय चतुब्बिधस्स मेरयस्स च पानतो अविरता.

अविज्जानिवुताति अविज्जाय निवारिता पिहिता. पियरूपाभिनन्दिनोति पियरूपं सातरूपं अभिनन्दमाना तुस्समाना. सादियन्तीति गण्हन्ति. अविद्दसूति अन्धबाला. सनेत्तिकाति तण्हायोत्तेनेव सयोत्ता. कटसिन्ति अत्तभावं. घोरन्ति कक्खळं. इमस्मिं सुत्तेपि गाथासुपि वट्टमेव कथितन्ति.

रोहितस्सवग्गो पञ्चमो.