१. चक्कसुत्तवण्णना

३१. चतुत्थस्स पठमे चक्कानीति सम्पत्तियो. चतुचक्कं वत्ततीति चत्तारि सम्पत्तिचक्कानि वत्तन्ति घटियन्तियेवाति अत्थो. पतिरूपदेसवासोति यत्थ चतस्सो परिसा सन्दिस्सन्ति, एवरूपे अनुच्छविके देसे वासो. सप्पुरिसावस्सयोति बुद्धादीनं सप्पुरिसानं अवस्सयनं सेवनं भजनं, न राजानं. अत्तसम्मापणिधीति अत्तनो सम्मा ठपनं, सचे पुब्बे अस्सद्धादीहि समन्नागतो होति, तानि पहाय सद्धादीसु पतिट्ठापनं. पुब्बे च कतपुञ्ञताति पुब्बे उपचितकुसलता. इदमेव चेत्थ पमाणं. येन हि ञाणसम्पयुत्तचित्तेन कुसलकम्मं कतं होति, तदेव कुसलं तं पुरिसं पतिरूपदेसे उपनेति, सप्पुरिसे भजापेति, सो एव च पुग्गलो अत्तानं सम्मा ठपेति. पुञ्ञकतोति कतपुञ्ञो. सुखञ्चेतंधिवत्ततीति सुखञ्च एतं पुग्गलं अधिवत्तति, अवत्थरतीति अत्थो.