९. धम्मपदसुत्तवण्णना

२९. नवमे धम्मपदानीति धम्मकोट्ठासा. अनभिज्झातिआदीसु अभिज्झापटिक्खेपेन अनभिज्झा, ब्यापादपटिक्खेपेन अब्यापादो, मिच्छासतिपटिक्खेपेन सम्मासति, मिच्छासमाधिपटिक्खेपेन सम्मासमाधि वेदितब्बो.

अनभिज्झालूति नित्तण्हो हुत्वा. अब्यापन्नेन चेतसाति सब्बकालं पकतिभावं अविजहन्तेन चित्तेन. सतो एकग्गचित्तस्साति सतिया समन्नागतो आरम्मणे एकग्गचित्तो अस्स. अज्झत्तं सुसमाहितोति नियकज्झत्ते सुट्ठु ठपितचित्तो इमस्मिं सुत्तेपि गाथायपि वट्टविवट्टं कथितं.