३. अप्पमेय्यसुत्तवण्णना

११६. ततिये सुखेन मेतब्बोति सुप्पमेय्यो. दुक्खेन मेतब्बोति दुप्पमेय्यो. पमेतुं न सक्कोतीति अप्पमेय्यो. उन्नळोति उग्गतनळो, तुच्छमानं उक्खिपित्वा ठितोति अत्थो. चपलोति पत्तमण्डनादिना चापल्लेन समन्नागतो. मुखरोति मुखखरो. विकिण्णवाचोति असञ्ञतवचनो. असमाहितोति चित्तेकग्गतारहितो. विब्भन्तचित्तोति भन्तचित्तो भन्तगाविभन्तमिगसप्पटिभागो. पाकतिन्द्रियोति विवटिन्द्रियो. सेसमेत्थ उत्तानमेवाति.