९. पठमनिदानसुत्तवण्णना

११२. नवमे निदानानीति कारणानि. कम्मानं समुदयायाति वट्टगामिकम्मानं पिण्डकरणत्थाय. लोभपकतन्ति लोभेन पकतं. सावज्जन्ति सदोसं. तं कम्मं कम्मसमुदयाय संवत्ततीति तं कम्मं अञ्ञेसम्पि वट्टगामिकम्मानं समुदयाय पिण्डकरणत्थाय संवत्तति. न तं कम्मं कम्मनिरोधायाति तं पन कम्मं वट्टगामिकम्मानं निरोधत्थाय न संवत्तति. सुक्कपक्खे कम्मानं समुदयायाति विवट्टगामिकम्मानं समुदयत्थाय. इमिना नयेन सब्बं अत्थतो वेदितब्बं.