८. पोत्थकसुत्तवण्णना

१००. अट्ठमे नवोति करणं उपादाय वुच्चति. पोत्थकोति वाकमयवत्थं. मज्झिमोति परिभोगमज्झिमो. जिण्णोति परिभोगजिण्णो. उक्खलिपरिमज्जनन्ति उक्खलिपरिपुञ्छनं दुस्सीलोति निस्सीलो. दुब्बण्णतायाति गुणवण्णाभावेन दुब्बण्णताय. दिट्ठानुगतिं आपज्जन्तीति तेन कतं अनुकरोन्ति. न महप्फलं होतीति विपाकफलेन महप्फलं न होति. न महानिसंसन्ति विपाकानिसंसेनेव न महानिसंसं. अप्पग्घतायाति विपाकग्घेन अप्पग्घताय. कासिकं वत्थन्ति तीहि कप्पासअंसूहि सुत्तं कन्तित्वा कतवत्थं, तञ्च खो कासिरट्ठेयेव उट्ठितं. सेसं उत्तानमेव. सीलं पनेत्थ मिस्सकं कथितन्ति.