२. पविवेकसुत्तवण्णना

९४. दुतिये चीवरपविवेकन्ति चीवरं निस्साय उप्पज्जनककिलेसेहि विवित्तभावं. सेसद्वयेपि एसेव नयो. साणानीति साणवाकचेलानि. मसाणानीति मिस्सकचेलानि. छवदुस्सानीति मतसरीरतो छड्डितवत्थानि, एरकतिणादीनि वा गन्थेत्वा कतनिवासनानि. पंसुकूलानीति पथवियं छड्डितनन्तकानि. तिरीटानीति रुक्खतचवत्थानि. अजिनानीति अजिनमिगचम्मानि. अजिनक्खिपन्ति तदेव मज्झे फालितं, सहखुरकन्तिपि वदन्ति. कुसचीरन्ति कुसतिणानि गन्थेत्वा कतचीरं. वाकचीरफलकचीरेसुपि एसेव नयो. केसकम्बलन्ति मनुस्सकेसेहि कतकम्बलं. वालकम्बलन्ति अस्सवालादीहि कतकम्बलं. उलूकपक्खिकन्ति उलूकपत्तानि गन्थेत्वा कतनिवासनं.

साकभक्खाति अल्लसाकभक्खा. सामाकभक्खाति सामाकतण्डुलभक्खा. नीवारादीसु नीवारा नाम अरञ्ञे सयं जातवीहिजाति. दद्दुलन्ति चम्मकारेहि चम्मं लिखित्वा छड्डितकसटं. हटं वुच्चति सिलेसोपि सेवालोपि कणिकारादिरुक्खनिय्यासोपि. कणन्ति कुण्डकं. आचामोति भत्तउक्खलिकाय लग्गो झामओदनो. तं छड्डितट्ठाने गहेत्वा खादन्ति, ओदनकञ्जियन्तिपि वदन्ति. पिञ्ञाकादयो पाकटाव. पवत्तफलभोजीति पतितफलभोजी. भुसागारन्ति खलसालं.

सीलवाति चतुपारिसुद्धिसीलेन समन्नागतो. दुस्सील्यञ्चस्स पहीनं होतीति पञ्च दुस्सील्यानि पहीनानि होन्ति. सम्मादिट्ठिकोति याथावदिट्ठिको. मिच्छादिट्ठीति अयाथावदिट्ठि. आसवाति चत्तारो आसवा. अग्गप्पत्तोति सीलग्गप्पत्तो. सारप्पत्तोति सीलसारं पत्तो. सुद्धोति परिसुद्धो. सारे पतिट्ठितोति सीलसमाधिपञ्ञासारे पतिट्ठितो.

सेय्यथापीति यथा नाम. सम्पन्नन्ति परिपुण्णं परिपक्कसालिभरितं. सङ्घरापेय्याति सङ्कड्ढापेय्य. उब्बहापेय्याति खलट्ठानं आहरापेय्य. भुसिकन्ति भुसं. कोट्टापेय्याति उदुक्खले पक्खिपापेत्वा मुसलेहि पहरापेय्य. अग्गप्पत्तानीति तण्डुलग्गं पत्तानि. सारप्पत्तादीसुपि एसेव नयो. सेसं उत्तानमेव. यं पनेत्थ ‘‘दुस्सील्यञ्चस्स पहीनं मिच्छादिट्ठि चस्स पहीना’’ति वुत्तं, तं सोतापत्तिमग्गेन पहीनभावं सन्धाय वुत्तन्ति वेदितब्बं.