१. समणसुत्तवण्णना

८२. चतुत्थस्स पठमे समणियानीति समणसन्तकानि. समणकरणीयानीति समणेन कत्तब्बकिच्चानि. अधिसीलसिक्खासमादानन्तिआदीसु समादानं वुच्चति गहणं, अधिसीलसिक्खाय समादानं गहणं पूरणं अधिसीलसिक्खासमादानं. सेसपदद्वयेपि एसेव नयो. एत्थ च सीलं अधिसीलं, चित्तं अधिचित्तं, पञ्ञा अधिपञ्ञाति अयं विभागो वेदितब्बो. तत्थ पञ्चसीलं सीलं नाम, तं उपादाय दससीलं अधिसीलं नाम, तम्पि उपादाय चतुपारिसुद्धिसीलं अधिसीलं नाम. अपिच सब्बम्पि लोकियसीलं सीलं नाम, लोकुत्तरसीलं अधिसीलं, तदेव सिक्खितब्बतो सिक्खाति वुच्चति. कामावचरचित्तं पन चित्तं नाम, तं उपादाय रूपावचरं अधिचित्तं नाम, तम्पि उपादाय अरूपावचरं अधिचित्तं नाम. अपिच सब्बम्पि लोकियचित्तं चित्तमेव, लोकुत्तरं अधिचित्तं. पञ्ञायपि एसेव नयो. तस्माति यस्मा इमानि तीणि समणकरणीयानि, तस्मा. तिब्बोति बहलो. छन्दोति कत्तुकम्यताकुसलच्छन्दो. इति इमस्मिं सुत्तन्ते तिस्सो सिक्खा लोकियलोकुत्तरा कथिताति.